Most Famous Bulleh Shah Poetry in Punjabi | Bulleh Shah Shayari

رہ رہ کے عشقا ماریائی
کہہ کس نوں پار اُتاریائی

آدمؑ کنکوں منع کرایا
آپے مگر شیطان دوڑایا
کڈھ بہشتوں زمیں رلایا
کیڈ پسار پساریائی


عیسیؑ نوں بن باپ جمایا
نوحےؑ پر طوفان منگایا
نال پیو دے پتر لڑایا
ڈوب انہانوں ماریائی

موسیٰ نوں کوہ طور  چڑھایو
اسمعیلؑ نوں ذبح کرایو
یونس ؑ مچھی الزام دیوایو
تاں مراتب چاہڑیائی


رہ رہ دے عشقا ماریائی
کہہ کس نوں پار اتاریائی

خواب زلیخا نوں دکھلایو
یوسف کھوہ وچ پوایو
بھائیاں نوں الزام دوایو
تاں مراتب چاڑھیا ای

بھٹھ سلیمانؑ توں جھوکایو
ابراہیمؑ خچہ وچ پایو
صابرؑ دے تن کیڑے پایو
حسن ؑ زہر دے ماریائی

منصور نوں چا سولی دتا
رہبر دا کڈھوایا پتا
ذکریاؑ سر کلوتر دتا
اس دا کی کم ساریائی


شاہ سرمد دا گلا کٹایو
شمس تے جاں سخن الایو
قم باذنی آپ کہایو
سر پیروں کھل اتاریائی


ایس عشق دے بڑے اڈنبر
عشق نہ چھپ دا باہر اندر
عشق کیتا شاہ شرف قلندر
باراں ورہے دریا وچہ ٹھاریائی


تیں لیلیٰ دے دھماں پایاں
تاں مجنوں نے اکھیاں لایاں
اوہنوں دھاراں عشق چنگھایاں
کھوہے برس گزاریائی

عشق تیرا ہیرے ول دھایا
تاں رانجھے نے کن پڑایا
صاحباں نوں دیا ہون آیا
سر مرزے دا واریائی

سسی تھلاں دے وچہ رلائی
سوہنی کچے گھڑے رڑھائی
روڈے پچھے گل گوائی
ٹکڑے کرکر ماریائی

فوجاں قتل کرایاں بھایاں
مشکاں چوہیاں توں کٹوایاں
ڈٹھی تیری قدرت سایاں
سر تیتھوں بلہاریائی

کور پانڈو کرن لڑائیاں
اُٹھاراں جوناں تدوں چھپایاں
اوتھے بھائی مارن بھائیاں
کہیڑا نیاوّں نرواریائی


نمرود سے آپ خدا کہایو
اس نے رب نوں تیر چلایو
مچھر توں نمرود مروایو
قاروں زمیں نگھاریائی

مغلاں زہر پیالے پیتے
بھوریاں والے راجے کیتے
سب اشرف پھرں چپ کیتے
بھلا انہاں نوں چھاڑیائی

بلھا شاہ فقیر بے چارا
روشن جگ وچہ نام تمہارا
چلیا دے کے کوچ نقارا
جھو ٹھوں سچ نتاریائی