Batil Ho | New Sufi Kalam | Sufiana Kaalam | Sufism | Urdu Sufi Lines |S...

Batil Ho | New Sufi Kalam | Sufiana Kaalam | Sufism | Urdu Sufi Lines 

باطل ہو قوی پھر بھی مٹے فِیل سے پوچھو
کس طرح مٹاتے ہیں ؟ ابابیل سے پوچھو
               
پیغامِ خدا ، غارِ حرا ، قربِ محمدﷺ
اِقرا   کا شرف حضرت ِ جبریلؑ سے پوچھو
               
فاروقؓ کے رقعے نے کیا خُشک کو پُر آب
مکتوبِ عمرؓ   ، حکمِ خدا نِیل سے پوچھو
               
یوسفؑ  نے کنویں پر جو لرز کر کہا بھائی     
وہ سوزِ برادر لبِ ہابیل سے پوچھو
               
 بِن  باپ کے لائے ، وہ جو بِن موت اٹھائے
وہ کون ہے؟ یہ صاحب ِانجیل سے پوچھو
               
اک روز فنا ہونا ہے یہ عالمِ دو رنگ
کیسے ؟ یہ کوئی صورِ سرافیلؑ سے پوچھو
               
ڈھانچے بنے ، پھر ماس چڑھا ، جی اُٹھے مُردے
حیرت کا سماں دیدہ ء حِزقیلؑ سے پوچھو
               
مقتول نے دی اپنے ہی قاتل پہ گواہی
تفسیر پڑھو قصہء عامیل سے پوچھو

آموزشِ تعظیم و ادب آدمِؑ خاکی
انجام تکبر کا عزازیل سے پوچھو

 شاعر : زبیر راج