Azam Chishti Kalam Lyrics | Best Sufiana Kalam | Sufism | Sufi Lines| Sa...

Azam Chishti Kalam Lyrics | Best Sufiana Kalam | Sufism | Sufi Lines

کیہا مقام تے کیہڑی منزل
میں کدھر قدم اٹھانواں
                    
کیہی شراب تے کیہڑا ساقی
میں کِتھے ہتھ پھیلانواں
                    
کیہڑا وصل تے کیہی جُدائی
میں کہنُوں ڈھونڈن جانواں
                    
اعظم میں خود کعبہ اپنا
میں کِتھے سِیس نوانواں
                    
جس دن دا ساقی نے مینوں
وحدت دا جام پِلایا
                    
اپنا آپ ڈِٹھا ہر پاسے
کوئی غیر وجود نہ پایا

اپنے آپ نوں کیتے سجدے
کِتے ہور نہ سِیس نوایا

اعظم مے خانے وچ آکے
مینوں پُوجا دا ول آیا

جے میں مٹھیاں بولیاں بولاں
مینوں واجاں مارن لوکی

جے میں تلخ حقائق کھولاں
مینوں جھٹ دُرکارن لوکی

جے میں جھوٹھے سُخن الاواں
میتھوں جندڑی وارن لوکی

اعظم جے سچ اکھ سناواں
مینوں پتھر مارن لوکی

کُجھ اس تڑپ جگایا مینوں
تد آیا دھیان سسّی دا

 کُجھ یاراں فرمائش کیتی
کراں حال بیان سسّی دا

کُجھ دل اُتے اثر پرانا
سن صدق ایمان سسّی دا

اعظم تد میں قلم اُٹھائی
لگاں درد سُنان سسّی دا

جس گھر وچ اولاد نہ کوئی
اُتھے کھان نوں اون دیواراں

ہوون لکھ سامان خوشی دے
نئیں پُتراں باہجھ بہاراں

دے کے جان خریدن لوکی
جے وكدے ہون بازاراں

اعظم کون سُنے رب باہجوں
بھاویں کرئیے جتن ہزاراں

رات دنے نت کرے دعائیں
جا ولیاں دے درباراں

آکھے ہتھ اٹھاؤ سارے
رب میریاں سُنے پُکاراں

نئیں اولاد نصیب جے میرے
مرے کس کم باغ بہاراں

اعظم کرو سفارش میری
رب کرے ناراض نہ یاراں