Azam Chishti Punjabi Kalam | Best Sufiana Kalam | Sufism | Sufi Lines

جے میں آن ڈیگاں در تیرے
مینوں بانہوں پکڑ اٹھانویں

میں آیاں فریادی بن کے
مینوں خیر حضوروں پانویں

چنگیاں دا سوگا ہک بازاراں
توں مندیاں نوں گل لانویں

اعظم ویکھیں پیار مرے نوں
مری صورت ول نہ جانویں

پُھٹے رنگا رنگ شگوفے
بھری نال مراداں جھولی

لایا آن نیم نے ڈیرا پُھل
کھیڈن لگ پیے ہولی

ہس پیے غُنچے نچیاں شاخاں
اتے کلیاں وی اکھ کھولی

اعظم پرت آئی ہر رونق
پوری ہوئی فقیر دی بولی

اک دن اٹھدیاں سانجھ سویرے
کجھ صاحب علم بولائے

سخت باریک دماغاں والے
کجھ اہل نجوم منگائے

جوتش رمل جفر دے
ماھرآ ارد گرد بٹھائے

اعظم ایس غریب سسّی دے
ہُن سمجھ بُرے دن آئے

کھول خزانیاں دے دروازے
آکھے جو منگو لے جاؤ

ایس مرے دل دے ٹکڑے دی
قسمت دا حال سناؤ

کتنی عمر ہوسی اس پھل دی
ذرا خوب حساب لگاؤ

اعظم کیہہ مقسوم سسّی دا
ذرا مینوں وی سمجھاؤ

ویکھ زمین تے چن آسمانی
اوہ بیٹھنے کھول کتاباں

کدی تلاوت کرن قمر دی
کدی کرن شمار شہاباں

اندروں شاماں تیِک بہ نکلے
جیوں ڈُبے وچ حساباں

اعظم دسن تے کی دسن
سسّی ویکھی وچ عذاباں

اک دوجے ول ویکھن سارے
کُجھ مونہوں نہ فرماندے

سارے عامل سر سُٹ بیٹھے
کُجھ ڈر دے کجھ شرماندے

اُڈ گئے ہُنروراں دے طوطے
منہ پیلے ہو ہو جاندے

اعظم سخت ہوئے درماندے
کجھ پیندے تے نہ کھاندے