Ishq Bina Ilam Jahalat Kalam Azam Chishti | Punjabi Sufi Kalam 2021 | Sa...

Ishq Bina Ilam Jahalat Kalam Azam Chishti | Punjabi Sufi Kalam 2021

بندیاں نال بھلا کی رشتہ
ایہناں تاریاں بے خبراں دا
 
کی تقدیر دے نال تعلق
ایہناں گونگیاں بے عقلاں دا
                    
دس کاغذ دیاں ایہہ تصویراں
کد کرن علاج غماں دا
                    
اعظم ہتھ دیاں ایہہ تحریراں
کد دسدیاں حال دلاں دا
                    
آسماناں دیاں  خبراں دیندے
جنہاں خبر نہ اپنے گھر دی
                    
سب نوں بخشن مال خزانے
خود بھیک مانگن در در دی
                    
ہل ہل پڑھن قرآن زبانوں
اتے دل وچ خواہش زر دی
                    
اعظم ایہناں بے عملاں دی
کد اثر نصیحت کر دی
                    
عشق بناں ہر علم جہالت
اتے غرق جہان كريندا
                    
سورج بن جیوں نور اکھاں دا
نئیں رستہ کوئی وکھیندا
                    
سوز بناں ہرساز نكارا
بھاویں ڈونگے راگ الیندا
                    
اعظم جے وس ہوندا میرے
میں ساڑ کتاباں دیندا
                    
سد کے فیر نجومی سارے
خود شہزادے فرمایا

دیہو جواب سوال مرے دا
دسو کیہہ کجھ نظریں آیا

جیوں جیوں لگاؤ سارے
میرا ہو وے وہم سوایا

اعظم اکھ معصوم سسّی دی
آج رکھیں لاج خدایا

اپنی لائی ہوئی اگ وچ
لگے آپے بھجن سارے  

وسدا شہر اجاڑن لگے
ایہہ جاہل غربت مارے

علم نجوم آیا ہتھ بھکھیاں
کدی رج نہ کھان وچارے

اعظم ڈوبن خلقت تائیں
خود پھردے رہن کنارے

ہو بیہوش ڈِگّا شہزادہ
سُن تختوں آن زمیںنے

سڑ گیا جِگر دل ہویا  گھائل
اگ بھڑک پئی وچ سینے

اک پل وچ پتھرا گیاں اکھیاں
لگے موت دے آون پسینے

اعظم ایہہ طوفان تد آوے
جدوں ڈوبنے ہون سفینے